Carding Kya Hoti Hai Aur Kaise Kare

27

Agar aap social media par active rehte hai toh aapne carding ke bare mein jarur suna hoga, Isey aap black hat hacking ya fir credit card ki chori bhi keh sakte ho. Yeh ek aisa galat raasta hota hai jo logo ko isey karne par majboor karta hai agar aapne ek baar isey kar liya uske baad aapki laalach bhi badhti jayegi aur aapke hatho crimes hote chale jayenge. Carding mostly america jaise country mein perform kiye jate hai lekin iska matlab yeh nahi ki Indians safe hai aajkal India mein bhi iss fraud ki madad se logo ko loota ja raha hai. Agar aap non technical person hai toh carding term samajhne ke liye aapko humari puri post padhni padegi kyuki iss post mein humne bata rakha hai ki carding kya hai, carding kaise kare, carding ke kya risk hai, carding se kaise bache aur bhi bahut kuch aapko iss mein milega toh chaliye shuru karte hai

carding

Internet par aise bahut se cyber crimes hote hai jinse hum jaise aam log anjaan rehte hai aur yeh crimes itne khatarnaak hote hai ki aapko jail bhejna inke liye kuch seconds ka kaam samjho, Aise crimes mein se ek crime ka naam hai Carding ab aap log yeh jarur soch rahe honge ki carding kya hoti hai toh chaliye main aapko iske bare puri detail ke sath batata hu. Yeh post unke liye nahi hai jo carding perform karna chahte hai yeh post unke liye hai jo carding ka matlab samajhna chahte hai aur isse bachna chahte hai

Yeh post puri tarah se educational purpose ke liye share ki ja rahi hai yahi wajah hai ki humne carding karne ke sabhi steps nahi bataye nahi toh koi bhi isey sikh kar kisi ko loot sakta hai hum nahi chahte ki humare wajah se kisi ka nuksan ho. So carders please stay away 😛

Carding Kya Hai Aur Kaise Kare:

Actually carding ek aise tarika hai jiska use online products ko free mein kharidne ke liye kiya jata hai. Carding ka use karke aap online kuch bhi free mein kharid sakte ho, Example ke liye agar aapke paas iPhone kharidne ke paise nahi hai toh aap carding ke raste jitne chahe utne iPhone kharid sakte ho woh bhi bilkul free

Carding jo perform karta hai usey carder kehte hai, Ab aapke mind mein ek aur question jarur aaya hoga ki aakhir carder itne costly products ko free mein kaise kharid lete hai ? So friends carder koi magic nahi ek tarah ki chori karte hai. Carders sabse pehle credit card ki chori karte hai taki woh uska use products ko kharidne ke liye kar sake itna hi nahi internet par aise bahut se sites hai jaha se aap credit card details bhi kuch paiso mein kharid sakte ho.

Carders kafi smartly apne iss kaam ko anjaam dete hai woh apna I.P. address hide karke carding ko anjaam dete hai taki woh police se bach sake itna hi nahi woh apna name, email bhi aisa chunte hai jo credit card details se match hote hai woh aisa isliye karte hai taki kisi ko unpar doubt na ho aur woh aasani se aisa kar sake

Internet par aise bahut se bloggers bhi hai jo carding jaise illegal kaam ko anjaam dete hai. Woh aise logo ki khoj mein rehte hai jo unke laalach wale jaal mein phas sake, Aur bahut se log unke iss jaal mein phas bhi jate hai aur carder unhe saste daamo unki mann pasand product kharid kar dene ka promise karke unhe bewakoof bana dete hai. Main aap logo ko warning dena chahunga ki kabhi bhi kisi carder par trust mat karna woh jab dusro ke mehnat ka paisa apne maje ke liye uda sakte hai toh aapko dhoka dena unke liye koi badi baat nahi hai waise bhi agar koi carder aapse kiya hua promise pura bhi kar de lekin agar police kabhi investigation karti hai toh uske sath aap bhi jail jaoge

So friends dekha aapne carder kaise dusro ki mehnat ki kamai ka use apne kaam ko pura karne ke liye karte hai. Aise log jyada din tak police se nahi bach sakte chahe woh kitne bhi smart kyu na ho. Agar aap bhi kisi aise bande ko jante ho jo carding jaise kaam karta hai toh usse kabhi bhi koi product na kharide chahe kitna bhi sasta kyu na ho

Carding Fraud Se Kaise Bache:

Sabse pehle toh main aapko yeh batana chahunga ki carding se agar aap bachna chahte ho toh aapko khud savdhaan hona pedga isme koi aapki help nahi karega lekin main aapko itna bata sakta hu ki carding se kaise bach sakte hai

1) Agar aap apne credit card ko carders se bachana chahte ho toh kabhi bhi unpopular site par par apne card details enter na kare kyuki unpopular site ki koi pehchaan nahi hoti ho sakta hai woh fake ho

2) Humesha site ke domain ke aage https check jarur karle kabhi http wale site par apne card details enter na kare kyuki http secure nahi hote jabki https secure hote hai

3) Kisi ke bhi sath apne card details kabhi share na kare chahe woh aapke relation mein kyu na aata ho kyuki aajkal trend kuch aisa chal raha hai baap bada na bhaiya sabse bada rupya 😀

4) Phishing websites se bache jo dikhne mein toh official site jaisi hongi lekin fake hoti hai. Actually phishing page banana koi bada kaam nahi hai koi bhi web developer isey aasani se bana sakta hai isliye phishing se bache. Main aapko suggest karunga ki aap google chrome use kare yeh phishing websites ko easily detect kar leta hai

5) Jab aap apne broswer mein kabhi card detail enter karte ho toh woh aapse iss detail ko save karne ke liye puchta hai so aapko humesha isey ignore karna hai kabhi isey apne browser mein save mat karna warna hack ho sakta hai

Final Words:

So friends aaj humne jana ki carding kya hoti hai aur isse hum kaise bach sakte hai. Aajkal internet ka use kafi tezi se badh raha hai jis wajah se fraud ke chances bhi badh rahe hai iss condition mein aapko smart rehna hoga nahi toh koi bhi aapko smartly loot sakta hai 😀 Iss post ke madhyam se main aap sabhi ko carding fraud se savdhaan rehne ke liye likha hai. Agar aapko humara post pasand aaya ho toh please isey like jarur kare